Die gebruik van deeltjiegeinduseerde X-straalproduksie (PIXE) as 'n navorsings- en ontledingstegniek is in die jongste tyd op groot skaal uitgebou. Energiedispersiewe X-straaldetektore, hetsy Si(Li)- of intrinsieke germanium, met hul besonder goeie oplosvermoe, word oor die algemeen in sodanige stelsels gebruik. 'n Belangrike tekortkoming van hierdie detektore is teltempobeperkings wat ontstaan as gevolg van die ophoping van pulse weens die lang elektroniese tydkonstantes wat vir pulsverwerking vereis word vir die verkryging van die allerbeste energie-oplosvermoe. 'n Stelsel wat op die pulsering van die Raad op Atoomkrag se Van de Graaffversneller se bundel berus, is vir PIXE se analitiese bundelpyp ontwikkel. Wanneer hierdie stelsel deur 'n gebeurtenis gesneller word wat deur die X-straaldetektor geregistreer word, deflekteer dit die versnellerbundel van die skyf af vir 'n tydsduur wat eweredig aan die pulsverwerkingstyd van die detektorelektronika is. Op hierdie wyse word geen verdere pulse ontwikkel nie wat andersins tot ophoping sou lei as gevolg van beskieting van die skyf gedurende die pulsverwerkingstyd in die detektor. Die basiese PIXE-ontledingstelsel en gegewens oor die ophoopsperbaan (PURC) en bundelgeometrie word beskryf. Die doeltreffendheid van die stelsel vir teltempo's tot 12 kHz word bespreek en tipiese PIXE-spektra, die gevolg van roetine-ontledingstudies, word vertoon om die praktiese uitvoerbaarheid van die tegniek te demonstreer. Die eindresultaat van die toepassing van die stelsel was dat die bedryfsteltempo met 'n faktor tien verhoog is, terwyl dit die uiterste in energie-oplossing handhaaf asook 'n voortreflike seinruisverhouding behaal. Die PURC-stelsel word op 'n roetinegronslag vir die ontleding van lugdeeltjie en ander monsters gebruik en deurgaans op alle studie van bundelgeproduseerde X-strale toegepas, waarby die gebruik van Si(Li)- of intrinsiekegermanium-detektore by die Van de Graaffversneller gemoeid is